Faíscas

A colección Faíscas xorde da necesidade de tender unha ponte entre o pasado e o presente da historia galega, recuperando modelos de mobles tradicionais e actualizándoos en formatos contemporáneos.
Con esta dinámica reviven arquetipos que sorprenden pola súa capacidade de adaptarse con plena vixencia ao mundo de hoxe e que, ao tempo que rescatan a lóxica dos nosos ancestros, se nos fan amigables mediante un deseño informal e distendido.
As posibilidades de xogo amplíanse cos elementos textís, que permiten acentuar os contrastes e facer respirar moda a obxectos cunha orixe que se remonta a centos de anos atrás.

MOBILIARIO

TRADICIONAL GALEGO

Unha investigación de campo ao longo do rural galego e a indagación nos contados libros e revistas que hai sobre o tema tennos permitido familiarizarnos cun tipo de mobiliario que, ao noso entender, ten aínda moita vida por diante se sabemos adaptalo á contemporaneidade.

Por iso, tentando evitar a carga de pesadez, tanto física como emocional, que moita xente atribúe aos mobles tradicionais, poñemos o deseño e a creatividade ao servizo de conseguir mobles, que sen renegar das súas raíces, nos agasallan co seu talante lúdico, desenfadado e xovial.

Carriño