A colección Aymat expande a ollada furtiva cara outros horizontes, e cun talante de complicidade, tende unha ponte para explorar posibles confluencias entre as culturas galega e libanesa, que se traducen en obxectos de mobiliario.
Como escenario de fondo, recréase a metáfora dunha viaxe pendente e o propio nome da colección desprega a pregunta: ¿cando? ¿Cando poderemos facer esa viaxe? Mentres se mantén viva unha esperanza.
Desexos e soños que se materializan por medio dunha colección na que se afronta un cambio de perspectiva para atenuar a rixidez do funcionalismo, e na que se compatibiliza a utilidade con valores simbólicos expresados a través de curvas e formas alegres.
Unha vontade de hibridación manifestada nunha paleta de cores caracterizada polo xogo de contrastes e na que o aceiro, combinado parcialmente coa madeira, se erixe como protagonista.
Unha das nosas coleccións máis vangardistas constitúe unha homenaxe a Jorge Varela e con ela particípase da posibilidade de obsequiar ás persoas que queremos a través daquilo que sabemos facer.
Formas desenfadadas concretan as posibilidades de diálogo e enriquecemento entre culturas, poñendo énfase en apartarse dos estereotipos e en abrir o intercambio á máxima liberdade creativa.
